Dae Brianza a Bosa – Una rivista natzionale pùblicat sas fotografias de sa domo de Sa Costa restaurada dae una còpia lombarda

Sa rivista mensile Casa Facile in su nùmeru de austu at publicadu unu servìtziu fotogràficu longu dedicadu a una de sas domos tìpicas de Bosa. Sa domo, “a turre” comente totu sas de Sa Costa, l’ant comporada e restaurada Monica Macciocca e Angelo Panzeri, còpia de imprendidores lombardos chi ant bèndidu su ristorante chi gestiant in Brianza pro si nche tramudare a Bosa, in ue istant 8 meses a s’annu e in ue tenent unu ristoranteddu ambulante chi si narat Dal Lisca e faghet màndigu de istrada (street food).

Sa domo l’at restaurada s’architetu Emi Ellena cun diretzione de traballu fata dae s’architetu Giovanni Mastinu. Ant rispetadu s’istrutura de orìgine, chi est de 4 pranos cun una sutea dae in ue si podet bìere su casteddu Malaspina a un’ala e sa turre aragonesa de Bosa Marina a s’àtera.

L’ant arredada cun trastes de s’artigianadu artìsticu de Pianalza e de àteros logos de Sardigna.

Comente ant torradu a nou sa domo, Monica e Angelo ant torradu a nou finas una roulotte chi dae 30 annos fiat firma in garàgiu. Como, torrada a nou, est parchegiada in S’Abba Druche e serbit a ospitare sos amigos de sa còpia.

(GF.P.)