In su fèstival europeu de sas limbas de minoria sa cantzone in sardu binchet su prèmiu de su pùblicu

Sa Sardigna binchet su prèmiu de su pùblicu in su Liet Inernational 2022, su fèstival europeu dedicadu a sa mùsica populare cantada in sas limbas de minoria chi s’est fatu in Tonder, in Danimarca. Ocannu su reconnoschimentu est istadu assignadu a Emanuele Pintus de Meana Sardo chi at rapresentadu sa Sardigna cun sa band sua e cun sa cantzone “Genia”. Custu branu est leadu dae “Linna”, s’album nou de Pintus in ue b’at deghe cantzones totu cantadas in sardu. Custa de ocannu est sa de trèighi editziones de custu fèstival e b’ant leadu parte 13 artistas chi ant cantadu in 13 limbas diferentes. Unu resurtadu de importu mannu pro sa limba sarda.

(M.G.S.)