“Notte romantica” in sas biddas prus bellas de Itàlia – Editzione 2022

Pro totu sos innamorados torrat sa “Notte romantica”, manifestatzione ideada dae s’assòtziu “I borghi più belli d’Italia” e dedicada a s’amore.

S’eventu, chi ocannu est imbàtidu a sa de 7 editziones, s’at a fàghere sàbadu 25 de làmpadas 2022 e dat sa possibilidade de visitare sas biddas chi aderint in un’atmosfera romàntica de mùsica e de bellesa. In totue s’ant a pòdere visitare mustras e logos de cultura e apretziare sa bellesa de su patrimòniu istòricu e culturale. In prus, sos ristorantes ant a presentare menù a tema e atmosfera a lughe de candela pro retzire sos innamorados.

Sa novidade de ocannu est su tema “Flash Mob – Musica Unplugged”: sas biddas aderentes invitant a totu sos chi sonant (finas a livellu amatoriale) a si esibire in sas carreras e in sas pratzas sena amplificatzione, pro dare ànima a sa bellesa de cussa note.

Bosa puru aderit a s’initziativa e invitat sos innamorados a la visitare: ant a pòdere passigiare ammirende su Temo, gustare sos aperitivos in batellu, visitare sos logos de cultura (abertos finas a sas 11 de note), mandigare cun menù a tema in sos ristorantes chi aderint e comporare in sas butegas chi ant a abarrare abertas finas a sas 11.

Chie cheret ischire in ue totu si faghet s’initziativa si podet cullegare a su situ https://borghipiubelliditalia.it/2022/06/09/la-notte-romantica-nei-borghi-piu-belli-ditalia-25-giugno-2022/.

(GF.P.)