Sos museos de Bosa

Sa paràula “museo” benit dae su grecu “mouséion”, est a nàrrere “logu dedicadu a sas Musas”, sas divinidades amparadoras de sas artes. In Bosa b’at unos cantos museos de artes diversas. In su cursu Vittorio Emanuele, in sa zona chi li narant “sa piata”, b’est su Museu “Casa Deriu”, in unu palatzu de s’Otighentos, chi mustrat comente fiat sa vida in una domo de nòbiles in su tzentru de Bosa. In sa domo si podent ammirare sos arredos originales, sos traballos a filet, sos logos destinados a sos tzeracos. S’edifìtziu est in tres pianos e est su resurtadu de s’acorpamentu de prus domos. S’espositzione est dividida in tres ambientes temàticos: in una parte bi sunt sas mustras temporàneas in contu de traditziones locales; un’àtera parte est su pianu nòbile, un’apartamentu signorile chi est abarradu comente fiat in s’Otighentos. Su tzentru de su museu est sa mustra permanente de sa produtzione artìstica de Melkiorre Melis, chi at fatu òperas meda de importu comente cuadros, mòbiles, ogetos de tzeràmica. Intre sos arredos e sas decoratziones de sa domo sunt de importu mannu su parquet de su saloto, su pavimentu de s’aposentu de letu cun majòlicas de manifatura campana de su sèculu XIX, armonizadas cun sa bòveda pintada cun cornitzes e vasos de frores. In fines sos ornamentos de sa sala de pràngiu de sos primos de su Noighentos.

Sa Pinacoteca Antonio Atza est de fronte a sa Casa Deriu, in sos locales de s’ex Biblioteca comunale. In intro bi sunt sas òperas donadas dae su pintore Antonio Atza a sa tzitade de Bosa. S’espositzione, dividida  in tantas salas, permitit de connòschere su percursu de un’artista chi est unu de sos mastros de s’arte sarda de sa segunda metade de su Noighentos.  Sas pinturas suas sunt presentes in sos printzipales museos de Sardigna e sunt chircadas meda dae sos colletzionistas. Custa est sa prus significativa espositzione de sas òperas de Atza. Unu giassu est dedicadu a sas òperas de àteros artistas amigos suos: Stanis Dessy, Giovanni Thermes e Giovanni Pisano.

Su Museu de sas Contzas est  in unu de sos edifìtzios cunservados mègius de su 1700, a faca a su frùmene Temo, ca impreaiant pròpiu cussa abba pro traballare sas peddes. Est dedicadu a s’atividade  de contzare sas peddes chi si faghiat in Bosa dae su Setighentos finas a sos annos Sessanta de su Noighentos. Su museu est abertu dae su 2011 e est divididu in duos pianos: in su pianu terra bi sunt sas bartzas originales in muradura chi si podent bìere passende subra una superfìtzie de bidru chi las ammuntat. Su percursu ammustrat sas tècnicas de traballu e su visitadore si podet immedesimare in su traballu mannu e dificultosu chi faghiant in mesu s’abba e sa carchina, traballende sas peddes, fintzas a nde fàghere produtos de calidade. In su pianu de subra b’at fotografias, machinàrios e atretzos impreados pro contzare sas peddes.

(M.G.S.)